O encontro permitiu analizar as melloras ergonómicas implantadas nas empresas, os retos da prevención e os desafíos actuais no diagnóstico da silicose

O Clúster da Pizarra de Galicia celebrou hoxe a II Xornada Técnica sobre Seguridade e Saúde no sector da Pizarra, un encontro que reuniu no Centro Tecnolóxico da Pizarra, en Sobradelo de Valdeorras, profesionais e expertos para analizar os principais desafíos en materia de prevención de riscos laborais e protección da saúde dos traballadores desta industria.

A xornada contou con cinco relatores que abordaron diferentes aspectos da seguridade e a saúde laboral, desde as melloras ergonómicas e as novas metodoloxías de extracción do po de sílice aplicadas nas empresas ata as estratexias de prevención e os retos que presenta o diagnóstico da silicose. O programa combinou perspectivas técnicas, industriais, preventivas e sanitarias, co obxectivo de compartir coñecementos e experiencias que contribúan a seguir mellorando as condicións de traballo no sector.

Apertura institucional

O presidente do Clúster da Pizarra de Galicia, Eliseo López Alonso, e o director xeral de Planificación Enerxética e Minas da Xunta de Galicia, Pablo Fernández Vila, foron os encargados de abrir a xornada.

Durante a súa intervención, Eliseo López puxo de relevo o compromiso do sector coa seguridade e a saúde dos traballadores e a necesidade de continuar avanzando en prevención. O presidente do Clúster incidiu en que a protección das persoas debe ocupar un lugar prioritario na actividade das empresas pizarreras e destacou o valor deste tipo de encontros para “compartir experiencias, coñecer novas solucións e afrontar conxuntamente os retos existentes”.

Así mesmo, agradeceu a colaboración da Deputación Provincial de Ourense na organización desta segunda edición, que dá continuidade a un espazo de formación e intercambio entre profesionais, especialistas e representantes institucionais.

Pola súa banda, Pablo Fernández Vila puxo en valor a pizarra como un material capaz de dar resposta ás tendencias arquitectónicas actuais, destacando a súa calidade, versatilidade e contribución ao desenvolvemento económico de Galicia. Así mesmo, incidiu na importancia de seguir avanzando en materia de prevención de riscos laborais para garantir que os profesionais do sector poidan desenvolver o seu traballo nas mellores condicións de seguridade e saúde.

“Detrás de cada peza de pizarra hai persoas, e desde a Xunta de Galicia temos claro que as persoas están no centro”, sinalou. Neste sentido, destacou os avances conseguidos na redución da sinistralidade laboral e reafirmou o compromiso de seguir traballando para alcanzar o obxectivo de cero accidentes. Ademais, trasladou o apoio da Xunta de Galicia a un sector estratéxico e fundamental para a economía e o desenvolvemento da comunidade autónoma.

Ergonomía, prevención e saúde laboral

A primeira ponencia correu a cargo dos enxeñeiros Daniel León González e José Luis Folla Castiñeiras, que abordaron as melloras ergonómicas no sector da pizarra e os novos sistemas de extracción do po de sílice. A súa intervención centrouse nas medidas e solucións que permiten mellorar as condicións de traballo nas empresas e avanzar na protección dos profesionais.

A continuación, Javier Madera García, doutor en Enxeñaría de Minas e experto en Hixiene Industrial, ofreceu a ponencia “Ao futuro, pola prevención”, centrada na importancia de seguir desenvolvendo estratexias preventivas para afrontar os desafíos do sector.

Pola súa banda, Diego Casal Ramos, subdirector xeral de Recursos Minerais da Xunta de Galicia, analizou a seguridade no sector da pizarra galego a través da súa evolución, da experiencia acumulada e dos retos actuais. A súa intervención permitiu repasar os avances realizados e abordar as cuestións pendentes para continuar mellorando a seguridade e a saúde laboral.

A última ponencia estivo dedicada aos desafíos diagnósticos da silicose. Cristina Martínez González, doutora en Medicina e especialista en Pneumoloxía e Medicina do Traballo, ademais de xefa da Sección de Pneumoloxía Ocupacional no Instituto Nacional da Silicose, afondou nas dificultades e nos retos que presenta o diagnóstico desta enfermidade desde os ámbitos médico e ocupacional.

Clausura da xornada

O subdirector xeral de Recursos Minerais da Xunta de Galicia, Diego Casal Ramos; o presidente do Clúster da Pizarra de Galicia, Eliseo López Alonso, e a deputada delegada especial da Deputación de Ourense en Valdeorras e alcaldesa de Carballeda de Valdeorras, María Carmen González Quintela, foron os encargados de clausurar o encontro.

Na súa intervención, Diego Casal Ramos destacou o apoio da Xunta de Galicia ao sector da pizarra. Así mesmo, adiantou que desde a Administración autonómica se incrementarán os recursos humanos en Ourense e Santiago de Compostela para ofrecer unha atención máis próxima e directa ás empresas. “Aumentaremos ademais o financiamento a través das liñas de axuda xa existentes, co obxectivo de acompañar o tecido empresarial, impulsar a súa competitividade e favorecer o seu desenvolvemento”, apuntou.

“Galicia é un territorio estratéxico para unha minería moderna, innovadora e de vangarda, e a Xunta seguirá traballando para fortalecer o sector e garantir o seu futuro”, engadiu.

Pola súa banda, Eliseo López agradeceu a participación dos relatores e asistentes e puxo en valor a continuidade dunha iniciativa que permite afondar en cuestións esenciais para o sector.

María Carmen González destacou o papel da pizarra como motor económico e xerador de emprego no medio rural, especialmente relevante para fixar poboación e crear oportunidades de futuro en Valdeorras. A alcaldesa de Carballeda subliñou que a seguridade e a saúde dos traballadores deben constituír unha prioridade permanente e defendeu a colaboración institucional “cunha industria fundamental para a competitividade, o desenvolvemento económico e o benestar social da comarca”.

Con esta segunda edición, o Clúster da Pizarra de Galicia reafirma o seu compromiso coa promoción de espazos de encontro e reflexión que favorezan o intercambio de coñecementos especializados e contribúan á mellora continua das condicións de seguridade e saúde no sector.

Asistentes durante la II Jornada Técnica de salud y seguridad.