O presidente da Xunta de Galicia coñeceu a nova estrada que conecta Casoio e Riodolas, unha infraestrutura que mellora o acceso a 25 explotacións activas do sector da pizarra
O presidente da Xunta de Galicia, Alfonso Rueda, puxo en valor o papel estratéxico do sector da pizarra durante a súa visita a Riodolas, en Carballeda de Valdeorras, con motivo da finalización das obras de mellora da estrada que conecta esta localidade con Casoio.
A actuación supón unha importante mellora das comunicacións e da accesibilidade a unha das principais zonas de actividade pizarreira de Galicia, ao dar servizo a 25 explotacións activas de extracción e transformación de pizarra. Trátase dunha vía utilizada diariamente por traballadores e vehículos vinculados ás canteiras e que resulta fundamental para o desenvolvemento da actividade industrial da zona.
Durante a súa visita, Rueda puido coñecer sobre o terreo o resultado duns traballos que supuxeron un investimento global superior aos 708.000 euros, financiado ao 50 % pola Xunta de Galicia e o Concello de Carballeda de Valdeorras. As actuacións incluíron a preparación e limpeza da vía, a nivelación da plataforma, a pavimentación e a renovación da sinalización.
A visita permitiu tamén poñer de manifesto a importancia económica e laboral da lousa para Carballeda de Valdeorras e para o conxunto da comarca. O sector xera máis de 2.000 empregos directos no municipio e constitúe un dos principais motores de actividade económica, emprego e xeración de riqueza do territorio.
O Clúster, presente durante a visita
O presidente da Xunta estivo acompañado, entre outros representantes institucionais e empresariais, por responsables do Clúster da Pizarra de Galicia: o seu presidente, Eliseo López; o vicepresidente, Daniel León; e o xerente, Severino González.
A presenza do Clúster permitiu compartir co presidente da Xunta a relevancia das infraestruturas para garantir a competitividade e o futuro da industria pizarreira, así como abordar de maneira informal algúns dos principais proxectos nos que traballa actualmente o sector.
A finalización da estrada de Casoio a Riodolas representa así un novo avance na mellora das infraestruturas vinculadas á actividade pizarreira, reforzando as comunicacións dun sector estratéxico para Valdeorras e para o conxunto de Galicia.
