A Federación Nacional da Pizarra quere trasladar a súa fonda preocupación polo impacto que está a ter no sector a actual crise enerxética derivada do conflito en Oriente Medio, que está a provocar un forte incremento do prezo dos carburantes e do transporte, tanto por estrada como por vía marítima. Esta situación está a afectar de xeito directo á competitividade dun ámbito de actividade estratéxico para Galicia e Castela e León, altamente internacionalizado e cunha grande dependencia da loxística.
Neste contexto, a Federación Nacional da Pizarra solicita a adopción de medidas urxentes que permitan paliar o incremento dos custos, en liña coas xa aprobadas para sectores como a agricultura, a gandaría ou a pesca, que actualmente contan con axudas específicas como subvencións ao combustible -incluíndo apoios directos por litro consumido- e liñas de financiamento para favorecer a liquidez e facer fronte á suba de custos.
O sector da pizarra atópase especialmente exposto a esta situación debido á súa elevada dependencia dos carburantes en todas as fases da actividade. Trátase dunha industria intensiva no uso de maquinaria na canteira e no transporte do material ata as fábricas, así como no desprazamento do persoal, o que implica un consumo moi elevado de combustibles.
A isto súmase a súa marcada vocación exportadora, xa que arredor do 95 % da produción destínase a mercados internacionais, realizándose aproximadamente o 80 % destes envíos por estrada, o que incrementa aínda máis a exposición ao encarecemento do transporte.
“Atopámonos ante unha situación moi preocupante”, recoñece o presidente da Federación Nacional da Pizarra, Eliseo López
Redución da competitividade
Ademais, o sector está a ver como se reduce a súa competitividade nos mercados internacionais, dado que resulta practicamente imposible repercutir o incremento dos carburantes e do transporte no prezo final do produto. Esta circunstancia agrávase se se ten en conta que os combustibles constitúen a segunda partida de gasto máis importante para as empresas, só por detrás dos custos de persoal, nunha actividade intensiva en man de obra.
O aumento sostido dos custos de produción e de transporte a destino está a xerar, polo tanto, unha perda progresiva de competitividade fronte a outros materiais alternativos, o que pode ter consecuencias directas na posición do sector nos mercados internacionais.
Por este motivo, a Federación Nacional da Pizarra considera imprescindible a posta en marcha de medidas específicas para o seu ámbito de actividade equiparables ás doutros sectores primarios. Neste sentido, o presidente da Federación Nacional da Pizarra, Eliseo López, advirte de que “nos atopamos ante unha situación preocupante xa que a suba dos carburantes encarece o prezo do transporte xerando un impacto moi negativo nun sector como o noso, fortemente dependente da exportación e da loxística”.
“Por iso solicitamos medidas urxentes semellantes ás aprobadas para outros sectores como axudas directas ao combustible ou liñas de financiamento específicas”, conclúe.
