O seu deseño, para o que se convocou un concurso, distinguirá aos galardoados co Premio de Construción Sostible con Pizarra, cuxa terceira convocatoria foi anunciada recentemente
O Clúster da Pizarra de Galicia abre a convocatoria do I Concurso para o deseño do galardón do premio Construción Sostible con Pizarra, unha iniciativa que nace co propósito de dotar de identidade material e artística o recoñecemento que distingue cada edición deste certame, convocado por primeira vez en 2021, e que recentemente presentou as bases da súa terceira edición.
“A creación dun galardón único, elaborado con pizarra galega, que simbolice os valores da sostibilidade, innovación e excelencia construtiva asociados a este material axudaranos a proxectar o alcance da convocatoria do Premio de Construción Sostible con Pizarra”, asevera o presidente do Clúster, Eliseo López.
A iniciativa de promover o deseño dun galardón específico fomenta o talento creativo e profesional no traballo realizado coa pizarra, reforzando o papel de Galicia como enclave de referencia internacional no deseño e transformación. Paralelamente, dótase o premio dun galardón físico, representativo e perdurable, e explóranse novas aplicacións artísticas da pizarra, concebida neste caso como peza escultórica deseñada por profesionais.
Participación aberta e proposta inédita
O concurso está aberto a calquera persoa física ou xurídica, con independencia da súa vinculación co ámbito artístico ou técnico. Cada participante poderá presentar un único deseño, que deberá ser inédito, orixinal e concibido para a súa realización total ou parcial en pizarra, material que terá un protagonismo principal na obra.
As dimensións do galardón non poderán superar os 25 centímetros de altura por 10 centímetros de ancho, favorecendo así a súa viabilidade técnica e reprodutiva. Valorarase especialmente a presentación de maquetas ou modelos en 3D que faciliten a comprensión do deseño proposto.
Presentación de propostas e documentación
Os deseños deberán axustarse ás bases da convocatoria, publicadas na páxina web do Clúster. O prazo de recepción de propostas permanecerá aberto ata o 17 de xuño de 2026, data límite tamén para a entrega completa da documentación requirida.
O xurado estará composto por representantes do Clúster da Pizarra de Galicia e profesionais de recoñecido prestixio nos ámbitos do deseño e da construción. O seu ditame será inapelable, farase público tras a súa aprobación en acta oficial e será comunicado a todas as persoas participantes por correo electrónico.
O proxecto gañador recibirá un premio de 1.000 euros e un diploma acreditativo, ademais de converterse no deseño oficial do galardón do “Premio Construción Sostible con Pizarra”.
Colaboración institucional
Para a organización, desenvolvemento e promoción do Concurso para o deseño do galardón do «Premio Construción Sostible con Lousa», o Clúster da Pizarra de Galicia conta co apoio e a colaboración da Consellería de Economía e Industria da Xunta de Galicia.
Bases concurso diseño del galardón del Premio Construcción Sostenible con Pizarra
